शणैं गोंयबाब कथामाळ करता आनीक नवे विक्रम
गोवा न्यूज खबरो | 08 August 2015 10:50 ISTएकाच दिसा गोंयच्या बाराय तालुक्यांनी 15 सुवातांचेर एक हजारांच्या वयर शालेय भुरग्यांक घेवन आनी देडशें परिक्षकांक घेवन खंयचीय सर्त जाल्ली आयकल्या?
गोंयचें कोंकणी भाशा मंडळ हो विक्रम करता. शणैं गोंयबाब कथामाळेच्या नांवान. कथामाळ चलता फाटलीं 15 वर्सां, पूण एकाच दिसा घेवपाचो विक्रम पोरूंसावन सुरू जाला.
ह्या वर्सा ही सर्त 31 ऑगस्टाक जातली. तालुको पावंड्याचेर. उपरांत 6 सप्टेंबराक राज्य पावंड्यावेली सर्त.
ही कथामाळ तीन गटांनी घेतात. पयली ते चवथी, पांचवी ते सातवी आनी आठवी ते धावी.
फाटल्या 15 वर्सांत कोंकणी भाशा मंडळान हे कथामाळेंतल्यान आवयभाशेंतल्या काणयो सांगपी कितल्योशोच पिळग्यो घडयल्यात अशें मंडळाचे अध्यक्ष चेतन आचार्य व्हडा अभिमानान सांगता.
हे कथामाळेक मेळपी उपाट प्रतिसाद पळोवन बार्देस आनी साश्ट तालुक्यांत तांकां दोन-दोन केंद्रां करचीं पडलीं. ह्या वर्सा फोंड्यांय आनीक एक केंद्र उगडलां.
घडये तिसवाडेय दुसरें केंद्र उगडचें पडत असो दुबाव मुखेल संयोजक शिरीष नायकाक मारता. कारण थंयच्यानय सुमराभायर प्रतिसाद आसा.
म्हत्वाची गजाल म्हणल्यार ही कथामाळ सरळ तालुको पावंड्यावेल्या केंद्रांत जायना. पयलीं दरेके शाळेंत जाता. तातूंतले जैतवंत केंद्रांत वतात. शालेय पावंड्यार पोरूं 3000 भुरगीं वांटेकार जाल्लीं.
इतले म्हत्वाचे सर्तिंतल्यान काणयेकार तयार जातात तांकां सारके तयार करचे आनी तांचें परीक्षणय वेवस्थीत जावचें देखून कोंकणी भाशा मंडळान आनीक एक उपक्रम सुरू केला अशें जोड-संयोजक प्राची प्रभावळकारान सांगलें.
भुरग्यांक तयार करपा खातीर अंदूंच्यान शिक्षकांच्यो दोन कार्यशाळो घेतल्यात. एक दक्षिणेंत आनी दुसरी उत्तरेंत. तीय खाजगी शाळांकडल्यान सुरवात न्हय, सरकारी शाळांकडल्यान. फुडल्या वर्सा मागीर सगळ्याच शाळां खातीर ह्यो कार्यशाळो जातल्यो.
हे अभिमानास्पद कथामाळे खातीर सगळेच वावुरतात देखून ती इतली येसस्वी जाता अशें मंडळाची आदली सचीव अन्वेषा सिंगबाळ सांगता.
पोरूंवरीच तांणी ह्याय वर्सा परिक्षकांचीय कार्यशाळा दवरल्या. उणेच 145 परीक्षक एकाच दिसा 15 केंद्रांनी समान मार्गदर्शक तत्वां घेवन कथामाळेचें परीक्षण करतात.
हे कथामाळेंत वांटेकार जाल्ल्या सगळ्यांक प्रशस्तीपत्रकां मेळटातच, पूण इनाम म्हुणून पयशे दिनात – पुस्तकां दितात. रोख इनाम म्हणटात तें फकत राज्य पावंड्यार जिखल्यार. कथामाळेचे निमतान भुरग्यांमदीं वाचपाचीय आवड निर्माण जावची देखून हो उपक्रम सुरू केला अशें श्री आचार्य सांगता.
इनाम दिवपाची सक्तीय ना आनी इनामांचेर मर्यादाय ना. केंद्रांच्या पावंड्यार तीन इनामां आसलीं तरीय काणयेचो पावंडो पळोवन इनाम दिनासतना रावपाची मेकळीक परिक्षकांक आसता.
आनी समजा सर्तकांचो आंकडो दरेका गटांत 15 परस वयर वचून 25 जालो जाल्यार दर 10 चडावत सर्तकांफाटल्यान एक इनाम वाडयतात.
आवयभाशेंतल्यान काणी सांगपाक येता ती मजा, कठोर परीक्षण आनी चडावत इनामांची मेकळीक हाका लागून वर्साकणकणी हे शणैं गोंयबाब कथामाळेचो प्रतिसाद वाडतच चल्ला.
कथामाळेची म्हायती आनी नेम सगळ्या शाळांनी धाडल्यातच. तरिकय आनीक म्हायती जाय जाल्यार तांणी चेतन आचार्य (9422389290), शिरीष नायक (9405222144) वो प्राची प्रभावळकार (9764269909) हांकां फोन करचो अशें मंडळान कळीत केलां.
Only two students from one school are accepted in each group. They cannot participate directly.