भाशा माध्यम प्रस्नाचेर आतां अल्पसंख्य-भोवसंख्य झूज?
गोवा न्यूज खबरो | 04 August 2015 21:54 IST
भाजपाचें सरकार पडल्यार कोंताक येता पूण गोंयच्या अल्पसंख्यांकांक बुद्द शिकयतले आनी इंग्लीश प्राथमीक शाळांक सरकारी अनुदान मेळूंक दिवचे नात अशी खर भुमिका राष्ट्रीय स्वयंसेवक संघ आनी भारतीय भाशा सुरक्षा मंचान घेतल्या.
काल इंग्लीश माध्यमीक शाळांचो पाखो घेवपी ‘फोर्स’ संघटनेचें आठ दीस चलिल्लें आंदोलन निवळटा म्हणसर आतां ‘भाभासुमं’चान 7 ऑगस्टाच्यान राज्यव्यापी आंदोलन सुरू करपाचें थारायलां.
हें सगळें पळयल्यार भाशेच्या नावान गोंयांत आतां जातीय झूज पेट्टलें काय कितें अशी भिरांत दिसूंक लागल्या. हातूंत संघावांगडा कोंकणी चळवळींतले म्हालगडेय देंवल्यात.
चर्च चलयता ते डायोसेनस सोसायटीच्या इंग्लीश प्राथमीक शाळांक मेळटालें तें सरकारी अनुदान बंद करचें अशी मागणी मंचान केल्या.
चर्चीमुखार बागोवन तांच्या इंग्लीश माध्यमाच्या शाळांक सरकारी अनुदान दिवपाचें धोरण 2011 वर्सा फाटल्या काँग्रेस सरकारान आपणायिल्लें.
ताचो विरोध करून भाजपा ‘भाभासुमं’ वांगडा रस्त्यार देंविल्ली आनी उपरांत 2012 वर्सा जाल्ले विधानसभा वेंचणुकेंतल्यान सत्तेर येतकीर मात आदले मुख्यमंत्री मनोहर पर्रीकार सरकाराच्या मंत्रिमंडळान काँग्रेसीचेंच धोरण परत मुखार व्हेल्लें.
उपरांत ह्या धोरणाचो कायदो करचे खातीर पर्रीकारान विधानसभेंत विधेयक मांडिल्लें आऩी तें चिकित्सा समितीकडेन धाडून दिल्लें.
तेंच विधेयक बेगोबेग ह्याच अधिवेशनांत संमत करात अशी मागणी घेवन ‘फोर्स’ संघटनेचे फुडारी साव्हियो लोपिसान पणजे आझाद मैदानार मरसर उपास सुरू केल्लो. ते भायर एक दीस वरभर रस्ते आडावन सरकाराचेर चेंपणय हाडिल्लें.
काल भाजपा आनी संयुक्त सरकाराचे मेळून 11 मंत्री आनी आमदारांनी मेळून हें विधेयक फुडल्या अधिवेशनांत संमत करपाचें बरोवन दितकीर लोपिसान उपास सोडिल्लो आनी आंदोलनय फाटीं घेतिल्लें.
म्हणटासर आज भाभासुमं उठलो आऩी तांणी ह्या इकराय आमदार-मंत्र्यांचो स्वाभिमानशुन्य अशा उतरांनी निशेध केलो.
“ह्या विशयाचेर काँग्रेस वेंचणुकेंत पडिल्ली. आतां भाजपाचें सरकारय पडल्यार कोंताक येता आनी 2017 चे वेंचणुकें भाजपाकय हार खावची पडल्यार उपकारता, पूण भोवसंख्यांकाचीं ताकद आतां गोंयचे चर्चिक आनी अल्पसंख्यांकांक दाखोवन दितलेच” अशें पत्रकार परिशद घेवन आज गोंयचे संघचालक सुभाष वेलिंगकारान जाहीर केलें.
मंचांतले संघाचे फुडारी सरकारा आड भुमिका घेनात म्हूण हातूंतल्या कोंकणी चळवळींतल्या म्हालगड्यांनी ह्याच सप्तकांत ‘कोंकणी लोकशक्ती’ म्हूण वेगळी संघटना स्थापन केल्ली.
पूण आज तातूंतले चडशे कोंकणी फुडारी पत्रकार परिशदेक आशिल्ले. तांचे फुडारी अरविंद भाटीकाराक एका पत्रकारान विचारलेः तांणी गाय मारली म्हूण तुमी पाडूक मारतले?
ताचेर भाटीकारबाबाची जाप अशीः “गाय मारतल्याक शिक्षा करनात जाल्यार आमकां पाडूक मारचेंच पडटलें. टी बी कुन्हान सांगिल्लो तो राष्ट्रावादाकडल्यान पयस वचपी अल्पसंख्यांक आतां गोंयांत परत तकली वयर काडपाक लागला. ताका आमची ताकद दाखोवचीच पडटली.”
ह्या देशांत वट्ट 2.5 कोटी क्रिस्तांव समाज आसा. पूण गोंय सोडून खंयच्याच क्रिस्तावांनी आवयभास सोडून इंग्लीश माध्यमांतल्यान प्राथमीक शिक्षण घेवपा खातीर सरकारी अनुदान मागिल्लें ना अशेंय तांणी सांगलें.
भाजपाच्या युती सरकारांत तीन मंत्री आऩी भाजपाचे चार आमदार धरून वट्ट 11 अल्पसंख्यांक आमदार-मंत्री आसात.
तेन्ना भाशा माध्यमाच्या ह्या प्रस्नाक जातीयवादी मोडण मेळ्ळ्यार सरकाराच्या अस्तित्वाक भिरांत तयार जावपाक शकता. कारण हातूंतल्या चडश्या क्रिस्तांव आमदारांनी इंग्लीश माध्यमाच्या शाळांक अनुदान दिवपाचे मागणेक तेंको दिल्लो आसा.
हे पत्रकार परिशदेक वेलिंगकार आऩी भाटीकार सोडून अनिल सामंत, नागेश करमली आनी पांडुरंग नाडकर्णी हाजीर आशिल्ले.
