इंग्लिशीचें आंदोलन हें चर्चीक धरून सरकार उडोवपाचें काँग्रेसीचें कारस्थान?
गोवा न्यूज खबरो | 31 July 2015 14:01 IST
इंग्लीश पालकांचें आज जाल्लें रास्ता रोको आंदोलन म्हणल्यार काँग्रेसीचें सरकार उडोवपाचें कारस्थान आसा आऩी ते खातीर चर्चिच्या शाळांक मुखार काडल्यात असो आरोप आज विधानसभेंत जालो.
तांणी सरळ सरळ चर्च आनी काँग्रेस एकठांय जाल्यात अशें म्हणलें ना. पूण चर्च चलयतल्या शाळेच्या वेवस्थापनांक धरून काँग्रेसीन हें आंदोलन केलां असो तांचो सूर आसलो.
तशेंच लुईस बर्जर लांच प्रकरणाकडल्यान लोकांचें लक्ष घुंवडावपा खातीर हें कारस्थान रचलां असोय आरोप भारतीय जनता पार्टीच्या आमदार आनी मंत्र्यांनी केलो.
मुख्यमंत्री लक्ष्मीकांत पार्सेकारान तर शाळेच्या वेवस्थापनांक धरून गोंयांत आकांतवादी शक्ती मुखार सरपाक लागल्यात अशी भिरांत उक्तायली.
इंग्लीश माध्यमाच्या सगळ्या प्राथमीक शाळांक अनुदान दिवचें आनी भाशा माध्यमाचें विधेयक ह्याच अधिवेशनांत हाडचें ही मागणी घेवन आज इंग्लीश पालकांनी केल्ल्या रास्ता रोको आंदोलनाचेर सगले सत्ताधारी आमदार विधानसभेंत तुटून पडले.
मात काँगेस, गोवा विकास पार्टी आनी सरकाराक हरशीं तेंको दिवपी वेळ्ळीच्या बेंजामीन सिल्वासारक्या आमदारांनी आंदोलनाचें समर्थन केलें.
शुन्य वरा वेळार पणजेचे आमदार सिद्धार्थ कुंकळ्येकारान हो विशय काडलो तेन्ना ह्याच विशयाचेर भाजपाचे सांत आंद्रेचे आमदार विष्णू वाघान नोटीस दिल्या तींय आतांच घेता अशें सांगून सभापती राजेंद्र आर्लेकारान हो विशय चर्चेक घेतलो.
ही चर्चा जेवणाची मदली सुटी घेवपा खातीर बंद केली तेन्ना सुमार 13 आमदार उलयिल्ले. अजून भौशीक बांदकाम मंत्री सुदिन ढवळीकार आनी वीज मंत्री मिलिंद नायक सोडून कोणूच मंत्री उलोवंक नाशिल्लो आनी विरोधी पक्ष फुडारी प्रतापसिंग राणेय उलोवंक नाशिल्ले.
मात मदींत राणेन उठून, चिकित्सा समितीकडेन हो प्रस्न आसतना मदींच ही चर्चा कित्याक असो प्रस्न केलो. तेन्ना भार आयिल्लेवरी मुख्यमंत्री पार्सेकार उठले आनी आमी हांगां भाशा माध्यमाचे भुमिकेचेर उलयनात तर आज जाल्ल्या रास्ता रोको आंदोलनाचेर उलयतात अशें आवाज चडोवनच सांगलें.
शाळांच्या वेवसास्थपानांक धरून चलयिल्ली ही दादागिरी आमी खपोवन घेवचे नात अशीय शिटकावणी तांणी दिली.
कुंकळ्ळेच्या अवर लेडी ऑफ हेल्थ हे शाळेच्या पालक-शिक्षक संघाक धाडिल्ली नोटीक दाखोवन शिक्षण खात्यावरवीं ह्या शाळांचेर खर कारवाय करची अशीय मागणी कांय सत्ताधारी आमदारांनी केली.
मात लोकशाय मार्गान चलिल्लें लोकांचें आंदोलन चिड्डून उडोवपाचो प्रयत्न सरकारान करचो न्हय आनी तातूंतल्या वातावरण आनी इबाडचें न्हय अशी शिटकावणी काँग्रेसीचे आमदार आलेक्स रेजिनाल्ड लॉरेन्सान दिली.
खंयचेच इंग्लीश शाळेचें अनुदान बंद करचे नात अशें मुख्यमंत्र्यान सांगून लेगीत सरकार अऩुदान बंद करतलें अशी फट पातळावन आंदोलन करप म्हणल्यार कारस्थानच असो सत्ताधारी आमदारांचो आरोप आसलो.
जाल्यार सराकाराचेर विस्वास उल्लो ना देखून पालक हाचेर कायदो जावचो म्हूण मागतात अशें हेर आमदारांचें म्हणणें आशिल्लें.
काँग्रेसीचे आलेक्स रेजिनाल्ड लॉरेन्स आनी मॉविन गुदिन्हो, गोवा विकास पार्टीचे कायतू सिल्वा आनी अपक्ष आमदार बेंजामीन सिल्वान आंदोलन करतल्यांक तेंको दिलो.
मात आंदोलनाचो निशेध करप्यांमदीं भाजपाचे कार्लोस आल्मेदा, निलेश काब्राल, विष्णू वाघ, प्रमोद सावंत, मिलिंद नायक, सुभाष फळदेयास, किरण कांदोळकार जाल्यार मगोचे सुदिन ढवळीकार आनी लवू मामलेदार हांचो आसपाव आशिल्लो.
ही चर्चा जेवणा उपरांत मुखार चलतली तेन्ना मुख्यमंत्री पार्सेकार कितें आश्र्वासन दितात तें पळोवचें पडटलें. कारण आंदोलनाक तेंको दिवपी आमदारांनी हें अधिवेशन सोंपचें पयलीं हें विधेयक संमत करचें अशें मागलां.
